ايه هو الكيتو دايت ؟ و ازاي تقدر تطبقه من غير تعقيد

يعني ايه كيتو دايت ؟ ، انا دخلت المواقع و الجروبات و توهت و مش فاهم حاجة !، انتوا ازاي بتفهموا الكلام المعقد ده .. انا عاوز اخس على الكيتو و مش عارف ابدأ ازاي ؟

كل  دي اسألة طبيعي تسألها و تقولها لنفسك لو انت دورت على الكيتو دايت و قريت و مع ذلك مفهمتش حاجة و مش عارف تبدأ ازاي او تعمل ايه !

هنا معانا هتعرف يعني ايه كيتو بطريقة بسيطة جدا تخليك على الأقل تبدأ اول خطوة في الطريق و بعد كدا مع الوقت انت هتبدأ مع نفسك تفهم أكتر و تتوغل في عالم الكيتو

 قبل اي حاجة انا شخص عادي زي زيك ، كل الي عملته اني بدأت على الكيتو و انا مش فاهم كل حاجة يدوب فاهم أساسيات و مع الوقت بقيت بفهم اكتر و اسأل و حتى الان بفهم اكتر و اكتر ، فمتخافش انك مش فاهم ده طبيعي جدا

أولا : يعني ايه كيتو دايت ؟

الكيتو دايت هو عبارة عن نظام غذائي بيخلي جسمك يعتمد على الدهون كمصدر طاقة بدلا من السكر
يعني ايه ؟ .. يعني دلوقتي انت جسمك ده عامل زي العربية ، العربية دي بتمشي بالســـكـــر (بنزين) يعني جسمك بيحول اي اكل انت بتاكله لسكر و بعد كدا يبدأ يحرقه و يستخدمه كطاقة
و لكن في الكيتو الجسم بيبدأ يعتمد على الــــدهون (كهربا)
و ده معناه اننا لما بندخل كيتو دايت اننا بنحول جسمنا من عربية بتمشي بالبنزين لعربية بتمشي بالكهربا

و ده بيكون عن طريق اننا بنغير الطريقة الي بناكل بيها فبنعتمد على الدهون في اكلنا لحد مالجسم يبدأ يتعود على الدهـــــون دي كمصدر للطاقة بتاعته و كدا يبقا احنا حولنا العربية من بنزين لكهربا

طيب انا ازاي هاكل كل الدهون دي و هخس؟

خلينا نتفق على حاجة .. انت جسمك عامل زي البيت بالظبط و الاكل بتاعك هو الفلوس الي انت بتكسبها في الشهر $$ و لما جسمك بيحرق ده معناه انه بيصرف فلوس (سعرات)

دلوقتي انا لو بيدخلي 2000 جنيه (سعر حراري ) و بصرف (بحرق) منهم 1500 بس  يبقا انا هحوش 500 جنيه (سعر حراري)  في البنك (الخلايا الدهنية)

طب انا لو بيدخلي 2000 جنيه (سعر حراري) و بصرف منهم 2500 يبقا انا كدا هضطر استلف 500 من البنك (الخلايا الدهنية) و ده معناه اني هحرق دهون


طيب معناه ايه الكلام ده .. الكلام ده معناه انك عشان تخس لازم يكون حرقك (الفلوس الي هتصرفها)
اعلى من السعرات الي بتاكلها (الفلوس الي بتدخلك) و ساعتها هيحصل عندك عجز في السعرات يسبب ان جسمك يجري على الخلايا الدهنية ياخد منها دهــــون المتخزنة جواها

هل الكلام ده معناه بقا اني ماكلش خالص و امنع الأكل فجسمي يحتاج طاقة فيجري على الخلايا الدهنية يسحب منها الدهون ؟ ، لأ طبعا لان معدل حرقك لما متاكلش سعراتك المحسوبة هيقل جدا و ساعتها  جسمك هيبدأ يتعب و مش هيحرق حاجة و هتعرض نفسك للخطر


الخلاصة : انك لو اكلت دهون و انت حاسب سعراتك مستحيل هتتخزن دهون جوا جسمك

خطوات بداية الكيتو دايت 

1-طيب ازاي احسب سعراتي الي المفروض اكلها في اليوم و انقص منها قد ايه ؟ 

زي مفهمنا فوق ان كل جسم ليه معدل حرق غير التاني ، و عشان كدا مينفعش نكتب جدول كل الناس تمشي عليه لأن احمد بيحرق غير محمد و أمنية بتحرق غير الاء

طب انا احسب سعراتي الحرارية الي المفروض اكلها في اليوم عشان اخس ازاي

1- هتحتاج انك تكون عارف وزنك ، و طولك ( ماشي يا عم دي سهلة )

2- هتحتاج  تبقا عارف نسبة دهونك .... ازاي يا عم الكلام ده ؟

عشان تعرف نسبة الدهون في 3 طرق

الأولي و ده الأسهل و لكن مش دقيقة عن طريق الصورة دي تقدر تحدد نسبة الدهون 

الحل الثاني انك تقيس وزنك و طولك و نسبة الدهون في اي صيدلية بتعمل حاجة اسمها INBODY و ده هنتكلم عنه بالتفصيل في موضوع تاني

الحل الثالث : انك هتجيب مازورة قياس و تقيس رقبتك بالسنتيمتر و منطقة البطن و الوركين و ده فيـــديـــو بيوضح ازاي تقدر تاخد القياسات دي و بعدين هتدخل هنــــــــــــا و تبدأ تدخل البيانات زي الطول و محيط الرقبة و البطن و الوركين
هتطلعلك نسبة الدهون بتاعتك

خلصنا حساب نسية الدهون ندخل على اهم خطوة و هي حساب السعرات الحرارية الي هنقدر ناكلها في الكيتو عشان نخس

1- هندخل على موقع ketodietapp  من هنـــــــــــــــــــا او عن طريق البرنامج بتاعهم ، و بعدين هتبدأ تدخل البيانات واحدة واحدة

العمر و الطول و الوزن ، بعدها هتيجي نقطة مهمة الي هي مستوى النشاط  طب اختار ايه

لو انت شخص بيقعد طول اليوم و مش بيتحرك كتير او بيتمشى حاجات بسيطة في اليوم يبقا هتختار Sedentary

لو انت شخص بيقوم باعمال تخليك واقف او بتعمل مجهود طوال اليوم او بتعمل تمرينات خفيفة 3 ايام اسبوعيا اختار Lightly active

لو انت بتتمرن من 3 - 5 مرات اسبوعيا اختار Moderately active 

و بعد كدا هيسألك عن حاجة اسمها ال Net carb و دي هتخليها من 20 - 25 جم و هقولك ليه تحت

بعد متخدل البيانات بتاعتك تحت هتلاقي ظهرلك كذا صورة للسعرات بتاعتك عشان تخس أفضلهم الي هي Moderate

يعني ايه الكلام ده ,, الكلام ده معناه انك الشخص الي حاسب سعراته -في الصورة- لازم ياكل اكل بـــ 2199 سعر حراري

منهم 183 جرام دهون و 119 جرام بروتين  و20 جرام بس كاربوهيدرات

هل ده معناه اني هجيب معلقتين سمنة وزنهم 183 جرام و اكلهم !!!!! انت مجنوووون !!!

لأ طبعا الأكل مش بيتحسب كدا خااااااالص ,, طب بيتحسب ازاي يا ابو العريف

اي حاجة احنا بناكلها بيبقا فيها ال 3 حاجات دول بروتين و دهون و كارب بس كل  حاجة نسبتها مختلفة 
يعني لو قولنا مثلا اننا بناكل صدر فرخة وزنه 100 جم ، فصدر الفرخة ده بيبقا فيه

165 سعر حراري منهم 30 جرام بروتين و 4 جرام دهون و 1 جرام كارب

يعني ده معناه ان كل نوع اكل جواه نسب مختلفة من البروتين و الدهون هتعرف ده ازاي هتعرفه مع الوقت و التعود و البرامج الي هتستخدمها تسهل عليك الدنيا

المهم : ايه الي هاكله في الكيتو و ايه الي همنعه ؟

احنا زي متفقنا من غير كلكعه ولا عك ولا شرح كبير ، احنا عاوزين نحول جسمنا من حرق السكر لانه يعتمد على حرق الدهون عشان كدا و بكل بساطة و من غير شرح كتيير هنمنع اي حاجة بتتحول سكر في جسمنا او بتساعد على ارتفاع السكر

1- النشويات او الكاربوهيدرات(الكارب)

يعني هنمنع    رز ، عيش ، مكرونة ، شوفان ، بليلة ،بطاطس ، قلقاس ، بطاطا ، المعجنات بكل اشكالها 

الدقيق و مستخدماته ، السكر العادي (ياعم حرام عليك كفاية كدا)

2-البقوليات

الفول ، و العدس و اللوبيا ... الخ

3-الفاكهة !

الفاكهة بكل انواعها ماعدا الفراولة و التوت البري الأسود ،،، (انت مجنون يا عم دي كلها فوايد و مذكورة في القران )
احنا هنا مش بنقول انها مضرة و لكن احنا عاوزين نتعالج من الدهون الزيادة الي عندنا عشان كدا لازم نضحي شوية و نمنع اي حاجة بتعلي السكر في جسمنا 

4- اللبن و الأجبان
ماعدا الأجبان عالية الدهون مثل الجبن الشيدر و الموتزريلا و الرومي

طيب ايه المسموح بقا ده انت مخلتش حاجة مقولتهاش ^_^

المسموح في الكيتو

كل أنواع الخضار الورقية (ملوخية - سبانخ - جرجير - خس .... الخ)

الخضار بنسب معينة مثل الطماطم و الجزر و البصل

كل أنواع البروتين ( البيض- اللحوم الحمراء - الفراخ- الأرانب - السمك - التونة - البط .... عيش حياتك في اي بروتين)

الدهون الحيوانية فقط زي السمنة البلدي - الزبدة البلدي و تكون 100% حيواني و منستخدمش اي زيوت نباتية او اي دهون مهدرجة او مصنعة لأنها ضارة و لكن الدهون الحيوانية دهون نافعة و تأثيرها نافع للجسم

الزيوت المسموحة (زيت الزيتون - زيت جوز الهند)


الكاربوهيدرات المسموحة : هي الكاربوهيدرات الي موجودة في الخضار و المكسرات ... الخ و لازم متعديش نسبة الكاربوهيدرات المسموحة يوميا عشان جسمك ميرجعش تاني يعتمد على السكر 

طيب دلوقتي انا هقضي يومي ازاي في الكيتو و هاكل ايه عشان  انا توهت منك 

اولا في الكيتو زي متفقنا انك لازم تحسب سعراتك و مينفعش تاكل اكتر من سعراتك في اليوم

و الشئ الأهم انك لازم في الوجبة الواحدة تخلي نسبة الدهون أعلى من نسبة البروتين


الحل الأول انك تنزل برنامج زي Fat secret او My fitness pal و تبدأ تدخل كل وجبة انت بتاكلها و تبدأ توازن النسب بتاعتك يوم اتنين تلاته لحد متتعود

الحل التاني انك متحسبش و تمشيها بالبركة و في الحالة دي انصحك بمشاهدة فيديو لايف الزتونة على جروب أبدأ كيتو لمحمد جلال

و عشان احنا بنحبك و عاوزين راحتك هننزل هنــــــــــــــا جداول لوجبات محسوبة السعرات و الدهون جاهزة تقدر تطبقها او تاخد من كل يوم الوجبة الي تعجبك و تطبقها 

اعرف مميزات الكيتو دايت من هنــــــــا